ত্ৰয়োদশ অধ্যায়
বৃদ্ধ ৰজাই ক'লে, "এইবাৰ সিহঁতে চবকে মাৰি পেলাব৷"
খুৰাদেউৱে ক'লে, "আপুনি ভিতৰলৈ সোমাই আহক৷ বাহিৰলৈ
নাযাব৷"
বৃদ্ধ ৰজাই ক'লে, "ঘৰৰ ভিতৰত সোমাই লাভ নাই৷ সিহঁতৰ লগত
লাইট মেচিনগান আছে৷ আমাৰ মানুহবোৰক মাৰিব ধৰিছে সিহঁতে৷"
সঁচাকৈ তাকেই ঘটিছে৷ কেইবাটাও জাৰোৱাই
মৰাৰ ভয় নকৰি বিদেশী কেইটাৰ পিনে খেদি গৈছিল, বিদেশী কেইটাই খট খট খট খটকৈ গুলী
চলালে, লগে লগে সিহঁত বাগৰি পৰিল মাটিত৷ জাৰোৱাৰ বিষাক্ত কাঁড় দুটা বিদেশীৰ
গাত লাগিছিল, কিন্তু সিহঁতৰ একো নহ'ল৷ সিহঁতে আগতেই বিষ প্ৰতিষেধক ইঞ্জেক্সন লৈ
থৈছিল৷
খুৰাদেউক ঠেলি বৃদ্ধ ৰজা ওলাই গ'ল বাহিৰলৈ৷ দুয়োখন হাত দাঙি ইংৰাজীতে ক'লে, "হ'লড অন৷"
লগে লগে বিদেশী এটাই হিংস্ৰভাৱে
সেইপিনে ঘূৰি চালে৷ তাৰ হাতত এটা দীঘল ধৰণৰ বন্দুক৷ সন্তুৱে বুজিলে, সেইটোৰ নামেই চাগে লাইট মেচিনগান৷
সন্তুৰ এনে লাগিল, বিদেশীটোৱে এতিয়াই বৃদ্ধ ৰজাক মাৰি
পেলাব৷
কিন্তু বৃদ্ধ ৰজাৰো কম সাহস নহয়৷ লাঠি
ঠুকুৰিয়াই ঠুকুৰিয়াই এখোজ দুখোজকৈ আগুৱাই গ'ল বিদেশী কেইটাৰ পিনে৷ তাৰ পিছত
ইংৰাজীতে ক'লে, "তোমালোকে মোৰ মানুহবোৰক নামাৰিবা৷ তোমালোকক যি লাগে লৈ যোৱা৷"
তেওঁ জাৰোৱাবোৰলৈ চাই কি জানো অদ্ভুত
শব্দ এটা উচ্চাৰণ কৰিলে৷ লগে লগে সিহঁতে দল বান্ধি পিছুৱাই যাবলৈ ধৰিলে৷ মুখেৰে এক
অদ্ভুত শব্দ কৰি কৰি৷ সেই শব্দটো কান্দোনৰ নিচিনা৷
আন এটা বিদেশী আগুৱাই আহি অতি নিষ্ঠুৰভাৱে
প্ৰচণ্ড চৰ এটা সোধালে বৃদ্ধ ৰজাৰ গালত৷ তেওঁ মাটিত পৰি গ'ল মুখ থেকেচা খাই৷ বৃদ্ধ ৰজাৰ বুকুত
গচকি ধৰি সি ক'লে, "ইয়াক এতিয়াই মাৰি পেলাওঁ৷ ই বুঢ়াই চব গলগ্ৰহৰ মূল৷ ইয়াৰ কথামতেই
আমাৰ বন্ধু এজনক ইহঁতে জুইত পুৰি মাৰিলে৷ কুকুৰে আমাকো মাৰি পেলালেহেঁতেন৷"
মেচিনগান হাতত থকা বিদেশীটোৱে ক'লে, "তাক এতিয়াই মাৰিব নালাগে, অলপ পিছত৷ তাৰ পৰা আৰু কিছু কথা উলিয়াব
পৰা যাব পাৰে৷"
যিডাল লতাৰে বিদেশী কেইটাক বন্ধা হৈছিল,
সেইডাল
লতাৰেই সিহঁতে বান্ধি পেলালে বৃদ্ধ ৰজাক৷
সেই অৱস্থাতো বৃদ্ধ ৰজাই ক'লে, "মোক মৰাৰ চেষ্টা নকৰিবা৷ তেতিয়াহ'লে তোমালোক কোনো ইয়াৰ পৰা জীৱন্তে সাৰি
যাব নোৱাৰিবা৷ তোমালোকে যি চুৰি কৰিবলৈ আহিছা, সেয়া লৈ গুচি যোৱা৷"
এটা বিদেশীয়ে বৃদ্ধ ৰজাৰ মুখত থুৱাই
দিলে৷
সন্তু আৰু খুৰাদেউৱে সেই জুপুৰি ঘৰটোৰ
দৰজাৰ কাষত মাটিত শুই আছে৷ মাটিত শুই থাকিলে সহজতে গাত গুলী নালাগে৷ বৃদ্ধ ৰজাৰ
এনেকুৱা দুৰ্দশা দেখি সিহঁত শিয়ৰি উঠিল৷
খুৰাদেউৱে আফচোচৰ সুৰত ক'লে, "ইছ, মোৰ ৰিভলভাৰটো এতিয়া লগত থকা হ'লে৷"
সন্তুৱে চালে, অলপ দূৰৈত খুৰাদেউৰ ৰিভলভাৰটো মাটিত
পৰি আছে৷ বিদেশী এটাৰ ভৰিৰ ওচৰত৷
কিন্তু চাৰিটা বিদেশীৰ হাতত বন্দুক,
এটাৰ
হাতত লাইট মেচিনগান, খুৰদেউৱে এটা ৰিভলভাৰেৰে কি কৰিব?
বিদেশী এটাৰ কান্ধত এটা বেগ ওলমি আছিল৷
সি সেইটো খুলিলে৷ তাৰ ভিতৰৰ পৰা বহুত কিবা কিবি ওলাল৷ বিভিন্ন ধৰণৰ যন্ত্ৰপাতি আৰু
এডাল খুব মোটা ফিটাৰ দৰে পকাই থোৱা বস্তু৷ সেইডাল টানি খোলাৰ পিছত দেখা গ'ল, সেইডাল আচলতে এডাল পানীৰ পাইপ৷ তাৰ এটা
মূৰত ধৰি দুটা বিদেশী দৌৰি গ'ল অন্ধকাৰৰ মাজলৈ৷ অলপ পিছতেই সেই পাইপডাল ফুলি
উঠিল আৰু তাৰ ইটো মূৰেৰে পানী ওলাবলৈ ধৰিলে৷ আন দুটা বিদেশীয়ে সেইডাল লৈ গ'ল জুইকুৰাৰ পিনে৷
খুৰাদেউৱে ক'লে, "সিহঁতে নিজৰাৰ পৰা পানী আনিছে৷"
সন্তুৱে ফুচফুচাই সুধিলে,
"সিহঁতে কিয় জুই নুমাব খুজিছে?"
খুৰাদেউৱে ক'লে, "যিটো পাথৰৰ পৰা এই জুই ওলাই আছে,
সেইটো
সাংঘাতিক মূল্যৱান৷ কোটি কোটি টকা৷ সেইটো সিহঁতে চুৰি কৰিবলৈ আহিছে৷ সেইটো নিশ্চয়
অন্য কোনো গ্ৰহৰ টুকুৰা বা উল্কা৷ হয়তো তাৰ ভিতৰত এনেকুৱা কোনো নতুন ধাতু আছে,
যি
পৃথিৱীৰ মানুহে কেতিয়াও দেখা নাই৷ সেইবিলাক পালে আমাৰ বিজ্ঞানৰ বহুত নিয়ম ওলটি যাব
পাৰে৷"
সন্তুৱে ক'লে, "এই পাথৰটো যে ইয়াত আছে বিদেশী কেইটাই
কেনেকৈ জানিলে?"
খুৰাদেউৱে ক'লে, "পৃথিৱীৰ ক'ত কেতিয়া উল্কাপাত হয়, বিজ্ঞানীসকলে তাৰ খবৰ ৰাখে৷ চবৰে
সন্ধান পোৱা যায়, কেৱল এইটোৰেই সন্ধান পোৱা নাছিল৷ সেই বুলি এই মানুহবোৰ বিজ্ঞানী নহয়৷
ইহঁত যিমান হিংস্ৰ আৰু নিষ্ঠুৰ, তাৰ পৰা অনুমান কৰিব পাৰি ইহঁত এটা ডকাইতৰ দল৷
কোনো বিজ্ঞানীৰ পৰা খবৰ পাই, ইয়ালৈ গুচি আহিছে৷"
সন্তুৱে ক'লে, "সিহঁতৰ লগতচোন এটা পাঞ্জাবীও
আছে৷"
খুৰাদেউৱে ক'লে, "এই পাঞ্জাবীটোৱেই ইহঁতক বাট দেখুৱাই
আনিছে৷ নিশ্চয় বহুত টকা দি হাত কৰিছে তাক৷"
তাৰ পিছত আৰু সিহঁতে কথা ক'ব নোৱাৰিলে, অবাক হৈ মুখ মেলি চাই ৰ'ল জুইকুৰাৰৰ পিনে৷
বিদেশী কেইটাই পাইপেৰে জুইলৈ পানী
মাৰোতেই এটা আশ্চৰ্য সুন্দৰ ঘটনা ঘটিল৷ জুইৰ ওপৰত পানী পৰাৰ লগে লগেই সেই পানী
লক্ষ লক্ষ ৰঙীণ ফুলজাৰীৰ দৰে উৰি যাবলৈ ধৰিলে আকাশৰ পিনে৷ সমস্ত ঠাইখন ৰঙা-নীলা
পোহৰেৰে ভৰি গ'ল৷ জুই নুমুৱাৰ নাম গোন্ধই দেখা নগ'ল৷
চাহাব কেইটা তেতিয়াও নৰ'ল৷ পানী মাৰিয়েই থাকিল৷ আৰু সন্তুৱে
একে দৃষ্টিৰে চাই ৰ'ল সেই ফুলজাৰীৰ পিনে৷ ইমান ধুনীয়া ৰঙৰ খেল সি কেতিয়াও দেখা নাই৷
এতিয়া আৰু ভয়-শংকা আদি ভাব তাৰ মনৰ পৰা নোহোৱা হৈ গ'ল৷
খুৰাদেউৱে ক'লে, "সেই জুই এই পৃথিৱীৰ নহয়৷ পৃথিৱীৰ
পানীৰে সেই জুই নুমাব পৰা নাযাব৷ সেই জুইতেই পাথৰটো জ্বলি জ্বলি এদিন নাইকিয়া হৈ
যাব৷"
বিদেশী কেইটাই এইবাৰ এটা বেগৰ পৰা মুঠি
মুঠি পাউডাৰ উলিয়াই জুইলৈ দলিয়াব ধৰিলে৷ সিও একো কাম নিদিলে৷ পাউডাৰবোৰ পৰাৰ লগে
লগেই দপকৈ একো একোটা শিখা ওলাই আহিবলৈ ধৰিলে৷
তাতো নিৰাশ নহ'ল বিদেশী কেইটা৷ এইবাৰ সিহঁতে এজোপা
সৰু ওখ গছৰ গুৰিলৈ গৈ মেচিনগানেৰে গুলী চলালে পঁচিছ-ত্ৰিশটা৷ তাৰ পিছত গছজোপা ধৰি
ঠেলা-হেঁচা কৰোতেই মেৰেককৈ ভাগি থাকিল৷
সিহঁত চাৰিজনে মিলি সেই গছজোপা দাঙি
আনি জুইৰ মাজত তাৰ এটা মূৰ সুমুৱাই দিলে বহুখিনি৷ গুৰুমকৈ শব্দ এটা হ'ল৷ পাথৰটুকুৰাত গছজোপাৰ খুন্দা লাগিছে৷
তাত উৎসাহিত হৈ বিদেশী কেইটাই গছজোপা
বাহিৰলৈ উলিয়াই আনি কিছুদূৰ পিছুৱাই আহিল৷ তাৰ পিছত বেগেৰে দৌৰি গৈ পুনৰ খুন্দা
মাৰিলে৷ পুনৰ গুৰমকৈ শব্দ হ'ল, জুইৰ শিখাবোৰ সামান্য লৰচৰ কৰি উঠিল৷
সন্তুহঁতে উশাহ ল'বলৈ পাহৰি গৈছে৷ সিহঁতে বুজি পাইছে
বিদেশী কেইটাৰ মতলব কি? সিহঁতে গছজোপাৰে খুন্দিয়াই খুন্দিয়াই জুইৰ মাজৰ পৰা পাথৰটো উলিয়াই আনিব
খুজিছে৷ নাইবা জুইৰে সৈতেই পাথৰটো ঠেলি ঠেলি নি নিজৰাত পেলাব৷
কিন্তু অলপ পিছতেই আন এটা সাংঘাতিক
ঘটনা ঘটিল৷ পাথৰটো সহজে লৰাব নোৱাৰাৰ কাৰণে সিহঁতে জোৰে জোৰে খুন্দা মৰিছিল৷ এবাৰ
খুন্দা মাৰিবলৈ গৈ ভাৰসাম্য ৰাখিব নোৱাৰি বিদেশী এটা জুইকুৰাৰ একেবাৰে ওচৰত
পৰিলগৈ৷ লগে লগে চুম্বকৰ দৰে জুইয়ে তাক টানি লৈ গ'ল ভিতৰলৈ৷ ঠিক যেন এখন হাতৰ দৰে জুইৰ
শিখা এটা ওলাই আহি টানি লৈ গ'ল তাক৷ সি এটা বিভৎস চিৎকাৰ কৰি উঠিল, তাৰ পিছত আৰু তাক দেখা নগ'ল৷
শেষ মুহূৰ্তত সন্তুৱে চকু মুদি দিছিল৷
পুনৰ যেতিয়া চকু মেলিলে, তেতিয়া দেখিলে, গছজোপা পেলাই দি বাকী বিদেশী কেইটা
ভয়তে আঁতৰি গৈছে৷ খুৰাদেউৱে কপালৰ ঘাম মচিলে৷
বিদেশীটো জুইত পৰি যোৱাৰ সময়ত দূৰৈৰ
জাৰোৱাবোৰে একেলগে চিঞৰি উঠিছিল৷ লগে লগে মেচিনগান হাতত লৈ থকাটোৱে সেইপিনে এজাই
গুলি কৰিলে৷
বৃদ্ধ ৰজাই হাত ভৰি বন্ধা অৱস্থাতে
পুনৰ আদেশৰ সুৰত ক'লে, "সিহঁতক নামাৰিবা৷ মই আদেশ দিলে সিহঁতে তোমালোকক এতিয়াই শেষ কৰি
দিব৷"
বিদেশীটোৰ খং উঠি গ'ল সেই কথাত৷ সি দাঁত কৰচি ক'লে, "বুঢ়া ধুৰন্ধৰ, এইবাৰ তোকেই জুইত জাপি দিম৷ এই লাৰি,
এই
বুঢ়াক দাঙি নি জুইত দলিয়াই দেচোন৷"
বাকী বিদেশী কেইটাই ওচৰৰে এঠাইত ৰৈ হতভম্ব
হৈ চাই আছে৷ সিহঁতৰ সংগী এটা সিহঁতৰ চকুৰ আগতেই জুইত জ্বলি গ'ল৷ কথাটো যেন সিহঁতে মানি ল'ব পৰা নাই৷
মেচিনগান হাতত লৈ থকা বিদেশীটো চাগে
সিহঁতৰ চৰ্দাৰ৷ সি কিন্তু ভয় খোৱা নাই৷ সি পুনৰ চিঞৰি ক'লে, "লাৰি, এইপিনে আহ, এই বুঢ়াটোক জুইত জাপি দে৷"
সিমূৰৰ পৰা লাৰিয়ে উত্তৰ দিলে,
"জেক, পাথৰটো পোৱাৰ কোনো আশা নাই৷ সেই জুইকুৰা মৃত্যুৰ জুই৷ ব'ল, আমি পলোৱাৰ চেষ্টা কৰো৷ নহ'লে আমি চব শেষ হৈ যাম৷"
জেকে ক'লে, "পলোৱাৰ আগতে প্ৰতিশোধ ল'ব লাগিব৷ এই বুঢ়াটো মোৰ চকুৰ আগতে
জুইত পুৰি ছাই হৈ যোৱা চাব খোজো৷ মই জাৰোৱা কেইটাৰ পিনে মেচিনগান ধৰি থাকিম,
তই
ইয়াক জুইত পেলাই দে৷"
লাৰি আগুৱাই আহিল৷
খুৰাদেউৱে ফুচফুচাই ক'লে, "সন্তু, মোৰ ৰিভলভাৰটো৷"
সন্তুৱে বগুৱা বাই লাহে লাহে আগবাঢ়িল৷
ৰিভলভাৰটো য'ত পৰি আছে, বিদেশীটো তাৰ পৰা অলপ দূৰত আছে৷ সন্তুৱে মাটিৰ ওপৰেৰে
শুই শুই গ'লে হয়তো সিহঁতে তাক নেদেখিব৷
তেনেতেই তিনিবাৰ কাউৰীয়ে কা কা কৰি
উঠিল৷
মানে ৰাতি পুৱাবৰ হৈছে৷ পোহৰ হ'বলৈ আৰু বেছি দেৰি নাই৷ আৰু কেইবাটাও
চৰাইৰ মাত শুনা গ’ল, আৰু কিহৰ জানো শব্দ এটা শুনা গৈছে কিছু দূৰৈত৷
সন্তুৱে ৰিভলভাৰটো লৈ উভতি অহাৰ সময়
নাপালে৷ লাৰিয়ে গৈ বৃদ্ধ ৰজাক দাংকোলাকৈ তুলি লোৱাত খুৰাদেউৱে আৰু ৰ'ব নোৱাৰিলে৷
তেওঁ উঠি কেংগেৰুৰ দৰে জঁপিয়াই জঁপিয়াই গুচি গ'ল সিহঁতৰ পিনে৷ চিঞৰি চিঞৰি ক'লে, "ৰ'বা, ৰ'বা, তেওঁক নামাৰিবা৷"
জেকে উচপ খাই উঠি খুৰাদেউৰ পিনে ঘূৰি
চালে৷ তাৰ পিছত ক'লে, "এয়া আৰু এটা চয়তান৷ ধৰ তাকো৷"
খুৰাদেউক দেখি বৃদ্ধ ৰজাই ক'লে, "মই কোনোপধ্যে ইংৰাজৰ হাতত নমৰো বুলি
প্ৰতিজ্ঞা কৰিছিলো৷ তোমাৰ বাবে সেই অপমান ভৰা মৃত্যু মই ভোগ কৰিবলগীয়া হৈছে৷ তুমিও
মৰিবা৷"
খুৰাদেউৱে লাৰিৰ পিনে চাই ক'লে, "তোমাক জাৰোৱাই জুইত পুৰি মাৰিব খুজিছিল,
সেই
সময়ত মই আহি তোমাক বচাইছিলো, নহয় জানো? তুমি এই বৃদ্ধ ৰজাক এৰি দিয়া৷"
লাৰিয়ে জেকৰ পিনে চালে, "এই দুয়োটা বুঢ়াক জুইত পেলাই দে৷ নহ'লে আমি পলাবৰ সময়ত ইহঁতে আমাৰ পিছত
জাৰোৱা লগাই দিব৷"
লাৰিয়ে তেতিয়াও মনে মনে থিয় হৈ থাকিল৷
জেকে ধমক দি ক'লে, "দেৰি কৰিছ কিয়? দে, জুইত জাপি দে৷"
লগে লগে আকাশত এটা প্ৰকাণ্ড ঘট ঘট ঘট
ঘট শব্দ শুনা গ'ল৷ দূৰৈৰ পৰা শব্দটো আগুৱাই আহিল একেবাৰে ওচৰলৈ৷ চবে চক খাই ওপৰলৈ
চালে৷ এখন হেলিকপ্টাৰ৷
লাৰিয়ে ক'লে, "জেক, সোনকাল পলা৷ হেলিকপ্টাৰ লৈ পুলিচ
আহিছে৷"
হেলিকপ্টাৰ দেখি সন্তুৰো ভাব হ'ল, নিশ্চয় সিহঁতক উদ্ধাৰ কৰিবলৈকে হেলিকপ্টাৰ
আহিছে৷ আৰু কোনো চিন্তা নাই৷ সি উঠি বহিল৷
জেকে দাঁত কৰচি ক'লে, "এখন মাত্ৰ হেলিকপ্টাৰ আহিছে৷ তাতে ভয়
কৰিবলগীয়া কি আছে? মই এতিয়াই সেইখন উৰুৱাই দিছো, মেচিনগানেৰে৷ তোমালোকে আঁতৰি যোৱা
নাইবা মাটিত শুই পৰা৷"
খুৰাদেউৱে চিঞৰি উঠিল, "সন্তু..."
সন্তুৱে ধৰিব নোৱাৰিলে, খুৰাদেউৱে সি কি কৰাতো বিচাৰিছে৷ হেলিকপ্টাৰখন
তললৈ নামি আহিছে৷ আৰু অলপ তললৈ নামিলেই জেকে গুলী কৰিব৷ সিহঁতৰ চব আশা ধূলিস্যাৎ
হৈ যাব৷
সন্তুৰ একেবাৰে ওচৰতে খুৰাদেউৰ
ৰিভলভাৰটো৷ সি সেইটো সাউতকৈ তুলি ল'লে৷ একো নভৱা নিচিন্তাকৈয়ে সি দুটা গুলী কৰি
দিলে জেকৰ পিনে৷ গুলীৰ শব্দত তাৰ নিজৰে কাণ তাল মাৰি ধৰিলে, প্ৰচণ্ড জোকাৰণি লাগিল হাতত৷ সি চকু
মুদি দিলে ভয়তে৷
পুনৰ চকু মেলি যেতিয়া দেখিলে, জেক মাটিত পৰি আছে, আৰু খুৰাদেউৱে মেচিনগানটো কাঢ়ি লৈছে তাৰ হাতৰ
পৰা৷
তাৰ পিছত সেইটো বাকী বিদেশী কেইটাৰ
পিনে টোঁৱাই ক'লে, "তোমালোক চবে শাৰী পাতি থিয় হোৱা৷ কোনোবাই অকণমান লৰচৰ কৰা দেখিলেই
গুলীয়াই দিম৷"
ঘট ঘট ঘট ঘট শব্দ কৰি হেলিকপ্টাৰখন
ঘূৰিবলৈ ধৰিলে সিহঁতৰ মূৰৰ ওপৰত৷ লাহে লাহে তললৈ নামি আহিছে৷ বহুখিনি ওচৰলৈ অহাৰ
পিছত তাৰ পৰা এটা অদ্ভুত শব্দ ওলাবলৈ ধৰিলে, কোনোবাই যেন মাইকত কথা কৈছে,
"আকিলা কিলকিল টুংকা টাকিলা! আকিলা কিলকিল টুংকা টাকিলা৷"
সন্তু আচৰিত হৈ গ'ল৷ এইবিলাক আকৌ কি?
সেই শব্দ শুনি জাৰোৱাবোৰে একেলগে চিঞৰি
উঠিল, "টাকিলা৷ টাকিলা৷"
হেলিকপ্টাৰৰ পৰা পুনৰ শব্দ ভাহি আহিল,
"কাকিনা ছুপি ছুপি৷ কাকিনা ছুপি ছুপি৷"
এইবাৰ জাৰোৱাই কোনো উত্তৰ নিদিলে৷ চবে
বৃদ্ধ ৰজাৰ পিনে চাই ৰ'ল৷ এটা জাৰোৱাই গৈ বৃদ্ধ ৰজাৰ গাঁথি খুলি দিলে৷
খুৰাদেউৱে বৃদ্ধ ৰজাক সুধিলে,
"সিহঁতে কি কৈছে?"
বৃদ্ধ ৰজাই ক'লে, "সেই বস্তুটোৰ পৰা কোনোবা এজনে জাৰোৱাৰ
ভাষাত কৈছে, তলৰ পৰা আঁতৰি দিবলৈ৷ সেইটো ইয়াত নামিব৷"
খুৰাদেউৱে ক'লে, "সকলোকে আপুনি আঁতৰি যাবলৈ কওঁক৷ জেগা
মুকলি কৰি দিবলৈ কওঁক৷"
এইবাৰ হেলিকপ্টাৰৰ পৰা কোনোবাই ইংৰাজীত
সুধিলে, "মিঃ ৰায়চৌধুৰী, আৰ ইউ দেয়াৰ? মিঃ ৰায়চৌধুৰী, আৰ ইউ দেয়াৰ?"
খুৰাদেউৱে চিঞৰি ক'লে, "য়েছ, আই এম হিয়াৰ৷ ৰায়চৌধুৰী
স্পিকিং..."
কিন্তু হেলিকপ্টাৰৰ ঘট ঘট শব্দৰ কাৰণে
হয়তো তেওঁৰ মাত তালৈ নগ'ল, কাৰণ তেওঁলোকে সেইষাৰ কথা বাৰে বাৰে কৈ যাবলৈ ধৰিলে৷
খুৰাদেউৱে বিদেশী কেইটাৰ পিনে মেচিনগান
তুলি ৰাখি চকু নাঁতৰোৱাকৈ চিঞৰি ক'লে, "সন্তু তোৰ পকেটত ৰুমাল আছে?"
ৰিভলভাৰেৰে গুলী চলোৱাৰ পিছত সন্তু
আচ্ছন্ন হৈ মাটিতেই বহি আছিল৷ এইবাৰ সি হুৰমূৰকৈ উঠি ক'লে, "অঁ, আছে৷"
খুৰাদেউৱে ক'লে, "সেই ৰুমালখন উলিয়াই মূৰৰ ওপৰত জোকাৰি
থাক৷"
সন্তুৱে তাৰ বগা ৰুমালখন উলিয়াই সোঁ
হাতত লৈ প্ৰাণপণে জোকাৰিবলৈ ধৰিলে৷
খুৰাদেউৱে বিদেশী কেইটাক আদেশ দিলে,
"তোমালোক চব মাটিত বহি দিয়া৷ প্ৰত্যেকেই হাত মূৰৰ ওপৰত তোলা৷"
এটা বিদেশীয়ে মাটিত পৰি থকা বন্দুক
এটাৰ পিনে হাত মেলিছিল, খুৰাদেউৱে ক'লে, "সাৱধান, অলপমান লৰচৰ কৰিলেই লাওখোলা উৰুৱাই
দিম৷"
হেলিকপ্টাৰখন লাহে লাহে আহি মুকলি
ঠাইখনত নামিল৷ প্ৰথমতেই তাৰ পৰা নামি আহিল ধকধকীয়া বগা দাড়িৰে এজন শিখ৷ তেওঁ হাত
দাঙি ক'লে, "টুংচা সংচু! টুংচা সংচু!"
বৃদ্ধ ৰজাই ক'লে, "টুংচা সংচু৷"
লগে লগে আটাইবোৰ জাৰোৱাই সেই শব্দটো কৈ
চিঞৰি উঠিল৷
বৃদ্ধ শিখজনে হেলিকপ্টাৰৰ পিনে হাত
জোকাৰোতেই তাৰ পৰা নামি আহিল আৰু কেবাজনো৷