নৱম অধ্যায়
বহুত চেষ্টাৰ অন্তত সন্তুৰ মুখেৰে এটা
মৃদু চিৎকাৰ ওলাই আহিল৷
খুৰাদেউৱে ঘূৰি চালে৷ এক মুহূৰ্তও পলম
নকৰি তেওঁ মানুহটোৰ হাতত ৰিভলভাৰৰ মুঠিটোৰে প্ৰচণ্ড জোৰে কোব এটা মাৰিলে৷
মানুহটোৱে সন্তুক এৰি দিলে, ধাঁচকৈ মাটিত বাগৰি পৰিল সি৷
মানুহটোৱে এইবাৰ মূৰটো দাঙি খুৰাদেউৰ
হাত এখনত কামুৰি ধৰিলে৷ খুৰাদেউৱে স্থান-কাল পাহৰি চিঞৰি উঠিল 'উঃ' বুলি৷ আৰু ইখন হাতেৰে ৰিভলভাৰৰ মুঠিটো
মাৰি দিলে তাৰ মূৰত৷ মানুহটো কাটি হৈ পৰি গ'ল, আৰু চকু দুটা মুদ খাই গ'ল৷
খুৰাদেউৱে বগুৱা বাই গৈ নিজৰাৰ পৰা
পানী আনি ছটিয়াবলৈ ধৰিলে সন্তুৰ চকুৱে মুখে৷ আৰু ব্যাকুলভাৱে মাতিবলৈ ধৰিলে,
"সন্তু, সন্তু৷"
অলপ সময় পিছত সন্তুৱে চকু মেলি চালে৷
সি হুৰমূৰকৈ উঠি বহিব খোজোতেই খুৰাদেউৱে বাধা দি ক'লে, "হ'ব হ'ব, উঠিব নালাগে৷ শুই থাক৷ অলপ পিছত চব ঠিক
হৈ যাব৷"
খুৰাদেউৱে এইবাৰ পানী আনি সেই মানুহটোৰ
মুখত ছটিয়াবলৈ ধৰিলে৷ সি কিন্তু চকু নেমেলিলে৷
খুৰাদেউৱে ক'লে, "মানুহটো মৰিয়ে থাকিল নেকি? মাৰি পেলালো নেকি মই?"
তেওঁ তাৰ নাকৰ ওচৰলৈ হাতখন নি ক'লে, "নাই, উশাহ নিশাহ লৈ আছে৷ অজ্ঞান হৈ পৰিছে৷
ৰক্ষা৷"
এইবাৰ তেওঁ মানুহটোৰ ক্ষত স্থান বিলাক
মচি দিলে৷ কিছু বন-লতা চিঙি তাৰ ৰস লগাই দিলে৷ মোজাৰ বেণ্ডেজটো বান্ধি দিলে পেটত৷
তাৰ পিছত ক'লে, "পেটৰ পৰা তেজ ওলোৱাটো যদি বন্ধ হয়, বাচি যাবও পাৰে৷"
সন্তু তেতিয়ালৈ উঠি বহিছে৷ এতিয়াও তাৰ
মূৰটো ৰিম-ঝিম কৰি আছে৷ সি ভাবিছিল, সি নাবাচিবই৷ ডিঙিটো ফুলি উঠিছে তাৰ৷
খুৰাদেউৱে সুধিলে, "এতিয়া কেনেকুৱা পাইছ? বিষাই আছে নেকি?"
সন্তুৱে ক'লে, "নাই৷"
"কি যে ভয়ানক ঘটনা এটা ঘটি গ’ল!"
সন্তুৱে অলপ অভিমানৰ সুৰত ক'লে, "মই তাক পানী আনি খুৱালো, তাৰ পিছতো সি মোক মাৰিব খুজিছিল?
তাক
মই বচাবলৈহে চেষ্টা কৰিছিলো৷"
খুৰাদেউৱে ক'লে, "ইহঁতে আমাক বিশ্বাস নকৰে৷ বাহিৰৰ
যিকোনো মানুহেই ইহঁতৰ বাবে শত্ৰু৷"
"মোৰ আৰু ইয়াত থাকি একদম ভাল লগা
নাই৷"
"কালি ৰাতিপুৱাই আমি গুচি যাম৷ পুলিচৰ
বোট আহিব৷"
"যদি নাহে?"
"নাহিব কিয়? নিশ্চয় আহিব৷ সিহঁতে আমাক উপেক্ষা কৰিব
পাৰিব জানো? আমি আজি ৰাতিটোৰ ভিতৰতে গোটেই দ্বীপটো এবাৰ ঘূৰি-পাকি চাই ল'ম৷ ৰাতিয়েই সুবিধা৷ তাৰ পিছত ৰাতিপুৱা
গৈ আমি সাগৰৰ পাৰত লুকাই থাকিম৷ বোট আহিলেই উঠি দিম৷"
ইমান বাধা-বিঘিনিৰ পিছতো খুৰাদেউৱে
দ্বীপটো ঘূৰি-পাকি চাব খুজিছে৷ তেওঁৰ উৎসাহ একোতে নকমে৷ ভয়-ভীত অকণো নাই৷ এপাত পেং
নাই, খোজেই কাঢ়িব পৰা নাই, অথচ দ্বীপটো চাইহে এৰিব৷
সন্তুৱে ক'লে, "আমি এতিয়াই সাগৰৰ পাৰলৈ গুচি নাযাওঁনো
কিয়?"
খুৰাদেউৱে ক'লে, "বাঃ, গোটেই দ্বীপটো নোচোৱাকৈয়ে গুচি যাম?
তেনেহ'লে আহিলো কিয়? গোটেইতো নোচোৱাকৈ নাযাওঁ৷"
পুনৰ তেওঁ সন্তুৰ কান্ধত ধৰি খোজ
কাঢ়িবলৈ ধৰিলে৷ নিজৰাৰ পাৰে পাৰে৷ যিহেতু বালিচৰখন চাফা, ভৰিত লতা চতা লাগি নধৰে ইয়াত৷ জোনৰ
পোহৰত সন্মুখটোও দেখা যায়৷
সিহঁতে বেছি দূৰলৈ যাব নাপালে৷ হঠাত দেখা গ'ল, অলপ দূৰৈত হাবিৰ মাজত এটা টৰ্চ জ্বলি উঠিছে৷
খুৰাদেউৱে লগে লগে সন্তুক ঠেলা মাৰি দি
নিজেও শুই পৰিল মাটিত৷ তাৰ পিছত বাগৰি বাগৰি নিজৰাটোৰ পাৰৰ পৰা আঁতৰি গৈ জোপোহা
এটাৰ আঁৰত লুকাই পৰিল তেওঁ৷ সন্তুও গ'ল তেওঁৰ পিছে পিছে৷
তেনেতেই গুৰুম গুৰুমকৈ দুটা গুলীৰ শব্দ
শুনা গ'ল৷
গুলীৰ শব্দটো প্ৰতিধ্বনিত হ'বলৈ ধৰিলে হাবিখনৰ মাজত৷ যেন দূৰৈৰ
কোনো পাহাৰত ঠেকা খাই খাই উভতি আহিছে শব্দবোৰ৷ তাৰ পিছত বেছ কিছু সময় ধৰি নিৰৱতা৷
সন্তুৱে প্ৰায় উশাহ-নিশাহ বন্ধ কৰি পৰি আছে৷ কিন্তু তাৰ বুকুৰ ভিতৰত যেনেকৈ ধান
বানিবলৈ আৰম্ভ কৰিলে, তাৰ ভয় লাগিল, কোনোবাই শুনি পেলাব বুলি৷
অলপ পিছতেই শুনা গ'ল খোজৰ শব্দ৷ একেলগে বহুত মানুহৰ ভৰিৰ
খোজৰ শব্দ৷ ভালকৈ মন কৰিলে বুজা যায়, যিয়ে খোজ কাঢ়িছে, সিহঁতে খালি ভৰিৰে খোজ কঢ়া নাই,
জোতা
পিন্ধি খোজ কাঢ়িছে৷ সিহঁত এইপিনেই আহি আছে৷ মাজে মাজে টৰ্চৰ পোহৰ জ্বলি উঠিছে আৰু
নুমাই গৈছে৷ অলপ পিছত প্ৰায় সাত আঠটা মানুহ আহি ৰ'ল নিজৰাটোৰ পাৰত৷ ইহঁত আটাইকেইটা
বিদেশী৷ নাই, আটাইকেইটা নহয়, এটা চাগে পাঞ্জাবী শিখ৷ সিহঁতে টৰ্চ জ্বলাই
চাৰিওফালে চাবলৈ ধৰিলে৷
এটাই ইংৰাজীতে ক'লে, "নিশ্চয় অলপ আগলৈকে ইয়াত কোনোবা আছিল৷
মই মাত শুনিছিলো৷"
আন এটাই ক'লে, "এয়া চা, বালিত খোজৰ চিন৷"
পুনৰ সিহঁতে টৰ্চৰ পোহৰ পেলালে নিজৰাটোৰ
দুয়োপাৰে৷
খুৰাদেউ আৰু সন্তু যদিও এটা ঘন জোপোহাৰ
আঁৰত লুকাই আছে, সেইটো কিন্তু নিজৰাটোৰ পৰা বেছি দূৰত নহয়৷ এই বিদেশী কেইটাই অলপ
ভালকৈ বিচাৰ-খোঁচাৰ কৰিলেই সন্তুহঁত ধৰা পৰি যাব৷ খুৰাদেউৱে ৰিভলভাৰটো মুঠি মাৰি
ধৰি আছে৷
বিদেশী কেইটাৰ দুটাৰ হাতত ৰাইফল,
বাকী
কেইটাৰ হাতত ৰিভলভাৰ৷ পাঞ্জাবীৰ দৰে মানুহটোৰ হাতত টৰ্চ৷
সন্তুৱে অনুভৱ কৰিলে তাৰ ভৰিৰ কাষত যেন
কিবা এটা লৰচৰ কৰি আছে৷ ঠাণ্ডা ঠাণ্ডা কিবা এটা তাৰ গাত লাগিছে৷ সাপ নেকি? খুৰাদেউৱে যদিও কৈছিল, ইয়াৰ সাপৰ বিষ নাই, সন্তুৰ কিন্তু কথাটো মনলৈ নাহিল
তেতিয়া৷ সি লগে লগে ভৰিখন আঁতৰাই আনিলে৷ এইবাৰ ভৰিখন পৰিল, এটা বেছ ডাঙৰ ঠাণ্ডা জীৱন্ত বস্তুৰ ওপৰত৷
সন্তুৱে ভীষণ ভয় খালে, সি মুখেৰে শব্দ নকৰিলে যদিও ভৰিখন আঁতৰাই নিওঁতেই শুকান পাতৰ খচমচনিৰ
শব্দ এটা হ'ল৷
লগে লগে টৰ্চৰ পোহৰটো সেইপিনে ঘূৰি গ'ল৷
কিন্তু সন্তুহঁত ধৰা পৰাৰ আগতেই বিদেশী
এটাই 'আঃ' বুলি চিঞৰি উঠিল৷ আন এটাই উত্তেজিতভাৱে ক'বলৈ ধৰিলে, "সিহঁতে আকৌ কাঁড় মাৰিছে৷ টৰ্চটো বন্ধ
কৰ, বুৰ্বক৷"
তাৰ পিছতেই একেলগে ছটা বন্দুক পিষ্টল
গৰজি উঠিল৷ সন্তুৱে ধৰিব পাৰিলে, সিহঁতৰ পিছ ফালৰ পৰা জাকে জাকে কাঁড় উৰি
আহিছে৷ কেইডাল মান কাঁড় গছৰ ডালত লাগি সৰি পৰিছে মাটিত৷ জাৰোৱাৰ লগত বিদেশী
কেইটাৰ যুদ্ধ আৰম্ভ হৈ গৈছে৷ সন্তুহঁত পৰি ৰ'ল মাজত৷ যিকোনো ফালৰ পৰাই গুলী বা
কাঁড় আহি লাগিব পাৰে সিহঁতৰ গাত৷ কিন্তু এতিয়া কৰিব পৰা একো নাই৷
বিদেশী কেইটা এঠাইতে ৰৈ থকা নাই,
জাৰোৱাই
যাতে সিহঁতক এইম কৰিব নোৱাৰে, তাৰ বাবে সিহঁতে ইফালে সিফালে দৌৰি ফুৰিছে, আৰু
ধাৰাসাৰ গুলী বৰ্ষণ কৰিছে৷৷ তেনেতে গুলীৰ শব্দ শুনি ক'ৰ পৰা জানো বনৰীয়া গাহৰিৰ জাক এটা ওলাই
আহিল৷ জীৱনত কেতিয়াও সিহঁতে এনেকুৱা শব্দ শুনা নাছিল- সেয়ে ভয়তে হুৰহুৰকৈ দৌৰি গ'ল নিজৰাটোৰ পাৰেৰে৷ প্ৰায় পঞ্চাছ ষাঠিটা
মান হ'ব৷
যুদ্ধ শাম কাটিল দহ মিনিট মানৰ
ভিতৰতেই৷ জাৰোৱাবোৰে কাঁড় মৰা বন্ধ কৰি পিছুৱাই গৈছে৷
বিদেশী এটাই ক'লে, "লেটছ মুভ৷"
আন এটাই ক'লে, "মোৰ গাত কাঁড় লাগিছে৷ উঠাই দে মোক৷
ইঞ্জেক্সন, ইঞ্জেক্সন কাৰ লগত আছে?"
তাৰ পিছত কিছু সময় গুণগুণনি চলিল৷ এটা
কাঁচৰ বটল ভঙাৰ নিচিনা শব্দ হ'ল৷ অলপ পিছত বুজা গ'ল, সিহঁত গুচি গৈছে৷
আৰু পাঁচ মিনিট মান অপেক্ষা কৰাৰ পিছত
খুৰাদেউ উঠি বহিল৷ সন্তুৱে উঠি প্ৰথমেই চালে তাৰ ভৰিৰ কাষৰ বস্তুটোনো কি৷ নাই সাপ
নহয়, এটা মস্ত ডাঙৰ ভেকুলী, প্ৰায় আধা কিলো মান ওজনৰ হ'ব৷ সন্তুৱে জোতাৰে ঠেলি ঠেলি সেইটো
আঁতৰাই পঠালে৷
খুৰাদেউৱে কোটৰ পৰা মাটি আৰু শুকান
ডাল-পাতবোৰ জাৰি জোকাৰি লৈ ক'লে, "আমি দুটা বিদেশীক পলোৱা দেখিছিলো,
কিন্তু
ইয়াত ইহঁত ছটা আছে৷ তাৰ মানে আগৰে পৰাই কেইটামান আহি বেলেগ কোনো দ্বীপত লুকাই
আছিল৷ আচৰিত জাত৷"
সন্তুৱে ক'লে, "খুৰাদেউ লাহে লাহে কওঁক, জাৰোৱাবোৰ ওচৰতে থাকিব পাৰে৷"
খুৰাদেউৱে ক'লে, "নাই, তাৰ সম্ভাৱনা নাই৷ জাৰোৱাবোৰ পলাইছে৷
সিহঁতে ভয় খাইছে৷ সিহঁতে এনেকুৱা কাণ্ড কেতিয়াও দেখা নাই ৷"
"কি? গুলীয়া-গুলী? বন্দুক-বাৰুদ দেখা নাই আগতে?"
"নহয়, বন্দুক বাৰুদ নহয়৷ মই যিমান দূৰ জানো,
জাৰোৱাই
বন্দুক-বাৰুদক ভয় নকৰে৷ সিহঁতে মৰিবলৈও ভয় নকৰে৷ কিন্তু এনেকুৱা ঘটনা সিহঁতে কেতিয়াও
দেখা নাই আগতে৷"
"কেনেকুৱা ঘটনা?"
"তই ধৰিব নোৱাৰিলি? এটাই যে ইঞ্জেক্সন ইঞ্জেক্সন বুলি
চিঞৰিছিল, শুনা নাছিলি?"
"অঁ, শুনিছিলো৷"
"এইবাৰ ইহঁত কেইটা সম্পূৰ্ণ প্ৰস্তুত হৈ
আহিছে৷ চাহাবৰ জাততো, একো ক্ৰুটি ৰখা নাই৷ চবেই জাৰোৱাৰ বিষাক্ত কাঁড়ক ভয় কৰে৷ কাঁড়ে গাত
লাগিলেই মানুহ মৰে৷ কিন্তু আমি পাহৰি যাওঁ যে বিষৰো ঔষধ আছে৷ আনকি, সাপৰ বিষো লগে লগে ঔষধ দি নষ্ট কৰি
পেলাব পাৰি৷ এই বিদেশী কেইটাই তাৰ ঔষধ লৈ আহিছে৷ কাঁড় লাগিও কোনো এটা মৰা নাই,
তাকে
দেখি ভয় খাই গৈছে জাৰোৱাবোৰ৷ এইবাৰ সিহঁত হাৰিবই৷"
খুৰাদেউৱে বগুৱা বাই নিজৰাৰ ফালে
আগুৱাই গ'ল৷ ইফালে সিফালে খেপিয়াই কি জানো বিচাৰিবলৈ ধৰিলে৷ অলপ পিছতেই পাই গ'ল এপাত কাঁড়৷ অতি সাৱধানে কাঁড়পাতৰ
পিছ মূৰটোত ধৰি পানীত ধুই ল'লে৷ তাৰ পিছত সেইপাত দেখুৱাই ক'লে, "এয়া চা৷ এনেয়ে এইপাত একো ডাঙৰ অস্ত্ৰ
নহয়৷"
সন্তুৱে চালে, কাঁড়পাত সঁচাকৈয়ে বিশেষত্বহীন৷
বহুখিনি খেলনা কাঁড়ৰ দৰে৷ কাঁড়ৰ মূৰত যে লোৰ টুপটো থাক, ইয়াত সেইটোও নাই৷ কাঁড়পাত বাহৰ৷ আগটো
অত্যন্ত জোঙা৷ কাঁড়পাতৰ পিছফালে পাখিও লগোৱা নাই৷
খুৰাদেউৱে ক'লে, "বিষ যদি নাথাকে এনেকুৱা কাঁড় গাত আঠ-দহপাত
লাগিলেও বিশেষ একো ক্ষতি নহ'ব৷ বিষৰ বাবে বিদেশী কেইটাই ইঞ্জেক্সন লৈ লৈছে৷
জংঘলতনো আৰু কিডাল বিষ পোৱা যাব? খুব সম্ভৱ জাৰোৱাবোৰে ষ্টিকনিন জাতীয় কিবা বিষ
ব্যৱহাৰ কৰে৷ লগে লগে এন্টিডট লৈ ল'লে সেই বিষে একো অনিষ্ট কৰিব নোৱাৰিব৷ বিদেশী
কেইটাই ভাবি চিন্তিয়েই সেই ঔষধ লৈ আহিছে৷ আমিও আনিব লাগিছিল৷"
খুৰাদেউৱে কাঁড়পাত নিজৰ বেগত ভৰাই
ল'লে৷ তাৰ পিছত এটা দীৰ্ঘ নিশ্বাস পেলাই ক'লে, "এই ছয়-সাতটা বিদেশীয়ে মিলি অনায়াসে
পাঁচশ-ছশ জাৰোৱা মাৰি পেলাব পাৰিব৷ আমি পোৰ্ট ব্লেয়াৰলৈ উভতি গৈ এতিয়াই এই কথাটো পুলিচক জনাব লাগিছিল৷"
কিন্তু পোৰ্ট ব্লেয়াৰলৈ যাব কেনেকৈ?
সন্তুৱে
তাকেই ভাবিলে৷ এই অন্ধকাৰ জংঘলৰ মাজেৰে সাগৰলৈ যোৱা ৰাস্তা বিচাৰি উলিওৱাটোৱেই
প্ৰায় অসম্ভৱ৷ সাগৰৰ পাৰ পালেই যেনিবা? লঞ্চ বা মটৰবোট ক'ত পোৱা যাব? দাশগুপ্ততো ভয়তে পলাই গ’ল৷ কালি যদি তেওঁ পুলিচ লগত লৈ উভতি
আহে...
খুৰাদেউৱে নিজকে কোৱাৰ দৰে ক'লে, "ইহঁতি এনেদৰে উঠিপৰি লাগিছে কিয়?
নিশ্চয়
ইয়াত কিবা দামী বস্তু আছে৷ ইয়াৰ আগত আহিছিল বিজ্ঞানীবোৰ৷ কিন্তু ইহঁতক বিজ্ঞানী
যেন লগা নাই, বিজ্ঞানীয়ে গুলীয়াই মানুহ নামাৰে৷ ইহঁত নিশ্চয় চোৰ-ডকাইত হ'ব৷"
তাৰ পিছত তেওঁ সন্তুৰ পিনে চাই
উত্তেজিতভাৱে ক'লে, "সন্তু তই এটা কাম কৰিব লাগিব৷ তাৰ বাবে খুব সাহসৰ প্ৰয়োজন৷ ভয় কৰিলে
কিন্তু নহ'ব৷ তই সাগৰৰ পাৰত গৈ লুকাই থাক৷ এতিয়া জাৰোৱাই সাগৰৰ পাৰত পহৰা দিবলৈ
সময় নাপাব৷ হ'লেও তই খুব সাৱধানে থাকিব লাগিব৷ দাশগুপ্তই কালি কোনো এটা সময়ত
মটৰবোট লৈ আহিবই৷ তাক চব বুজাই ক'বি৷ দৰকাৰ হ'লে পঞ্চাছ ষাঠিজন পুলিচ লৈ ভিতৰলৈ
সোমাই আহে যেন৷ যিকোনো উপায়েৰে হওঁক এই বিদেশী কেইটাক ধৰিবই লাগিব৷ ৷ যা, তই আগবাঢ়৷"
সন্তুৱে অবাক হৈ ক'লে, "মই অকলে যাম?"
"অঁ৷"
"মই কিয় অকলে যাম? নাই, সেইটো হ'ব নোৱাৰে৷"
"বেছি কথা নক'বি৷ তই অকলেই যাব লাগিব৷"
"তুমি ইয়াত থাকিবা? তোমাক সিহঁতে মাৰি পেলাব৷"
"সহজে নোৱাৰিব, মই লুকাই থাকিম৷"
"খুৰাদেউ, মই তোমাক এৰি ক'লৈকো নাযাওঁ৷ মায়ে কৈ দিছে, অনবৰতে তোমাৰ লগত থাকিবলৈ৷"
"সন্তু, অবুজন নহ'বি৷ ইয়াতে এতিয়া দুয়ো একেলগে থকাৰ কোনো
যুক্তি নাই৷ দুয়ো মৰিব লাগিব৷ মোৰ বহুত বয়স হৈছে, মই মৰিলেও সিমান আফচোচ নাই! মানুহটো
এদিন নহয় এদিন মৰেই! হ'লেও মৰাৰ আগতে এই ৰহস্যটো জানি যাবলৈ চেষ্টা কৰিম৷ তই বাচিবই লাগিব৷
তাৰোপৰি, তই গৈ দাশগুপ্তক খবৰ দিলে সিহঁতে মোক বচোৱাৰ চেষ্টা কৰিবও
পাৰে৷"
"কিন্তু তুমিচোন এপাত পেঙেৰে বেছি সময়
খোজ কাঢ়িবও নোৱাৰিবা৷"
"মই ৰাতিটো ইয়াতেই জোপোহাটোৰ মাজত শুই
থাকিম৷ ৰাতিপুৱা এটা গছৰ ঠানি যোগাৰ কৰি ল'ম৷ মোৰ অসুবিধা নহয়৷ সাগৰৰ পাৰটোৱেই
এতিয়া আটাইতকৈ বেছি নিৰাপদ৷"
"কিন্তু মই আন্ধাৰে-মুন্ধাৰে সাগৰৰ
পাৰলৈ যাম কেনেকৈ? ৰাস্তা হেৰুৱাই পেলাম৷"
"সাগৰৰ পাৰলৈ যোৱাতো একেবাৰেই সহজ৷ এই
নিজৰাটো যিহেতু পোৱা গ'ল৷ ইয়াৰ পাৰে পাৰে গৈ থাকিলেই হ'ল৷ নিজৰাটো নিশ্চয় সাগৰত পৰিছেগৈ৷ খুব
সাৱধানে যাবি কিন্তু৷"
সন্তুৰ মনৰ মাজত কান্দোন উথলি উঠিল৷ সি
খুৰাদেউৰ হাতত চেপি ধৰি ক'লে, "খুৰাদেউ, মই নাযাওঁ৷ মই তোমাক অকলে এৰি থৈ কোনো
কাৰণতেই নাযাওঁ৷"
খুৰাদেউৱে সন্তুৰ মূৰত হাত থৈ গধুৰ মাতেৰে
ক'লে, "সন্তু, এইবাৰ তোক ইয়ালৈ আনিয়েই ভুল কৰিলো৷ এনেকুৱা বিপদ হ'ব পাৰে বুলি মই ভবাই নাছিলো৷ কিন্তু
ইয়াত আমি দুয়ো একেলগে থকাতো বেছি বিপদজনক৷ পুলিচক এটা খবৰ দিয়াটো অত্যন্ত
জৰুৰী৷"
"তুমিও ব'লা মোৰ লগত৷"
"মই গ'লে নহ'ব৷ মই সেই বিদেশী কেইটাৰ ওপৰত চকু ৰাখিব
খোজো৷"
"তুমি অকলে কি কৰিবা সিহঁতৰ লগত?
সিহঁত
যদি পুনৰ এইপিনে আহে?"
"মই লুকাই থাকিম৷ সিহঁতে মোক নেদেখে৷ মই
তোক কথা দিছো৷ মই ইয়াতেই থাকিম৷ বেলেগ ক'লৈকো নাযাওঁ৷"
"তেনেহ'লে অকলে অকলে কিয় বহি থাকিব লাগে?
নাই
খুৰাদেউ, তুমি ব'লা মোৰ লগত৷ মই অকলে কোনো কাৰণতেই
নাযাওঁ৷"
খুৰাদেউৱে এইবাৰ কঠোৰ মাতেৰে ক'লে, "সন্তু, তোক যাবলৈ কৈছো নহয়, যা৷ তই নাজান, মোৰ কথাৰ যে লৰচৰ নহয়? মই বহুত ভাবি চিন্তিয়েই তোক যাবলৈ
কৈছো৷ মই ইয়াতেই থাকিম৷ যা, এতিয়াই ৰাওনা হ'৷"
সন্তুৱে আৰু কথা ক'বলৈ সাহস নকৰিলে৷ এখোজ দুখোজকৈ যাবলৈ
আৰম্ভ কৰিলে৷ কেবাবাৰো পিছলৈ ঘূৰি ঘূৰি চালে, কিন্তু অলপ পিছতেই খুৰাদেউক আৰু নেদেখা
হ'ল৷ তেওঁ লুকাই পৰিছে জোপোহাৰ অন্ধকাৰৰ মাজত৷ সন্তুও ডাঙৰ শিলটোৰ
সিপাৰে গুচি গ'ল৷
নিজৰাৰ পাৰৰ বালিৰ ওপৰত জোনৰ স্নিগ্ধ
পোহৰ, তাত সন্তুৰ ছাঁ পৰিছে৷ সেই ছাঁটোৱেই তাৰ সংগী৷ হাবিখন ইমানেই
নিস্তব্ধ যে ভাবিলেই গা চমচমাই যায়৷ ক'ত গোপনে গছৰ ওপৰত জাৰোৱা লুকাই আছে
কোনে জানে? যিকোনো সময়তে কাঁড় আহি গাত লাগিব পাৰে৷
সন্তুৱে খৰধৰকৈ নিজৰাৰ পাৰৰ পৰা উঠি
হাবিৰ মাজত সোমাল৷ নিজৰাৰ পাৰত থাকিলে দূৰৈৰ পৰাও দেখা যায়৷ পিছে হাবিৰ মাজত
সোমোৱাৰ পিছত ছাঁটোৱেও তাৰ লগ এৰিলে৷
তাৰ মনটো খুব বেয়া লাগিছিল৷ খুৰাদেউক
তেনেকৈ এৰি থৈ অহাটো জানো ঠিক হ'ল? অকলে এই ভয়ংকৰ জংঘলৰ মাজত তেওঁ কিমান
সময় লুকাই থাকিব পাৰিব? নিজে ভালকৈ খোজো কাঢ়িব নোৱাৰে৷ কিন্তু খুৰাদেউৱে যে কেতিয়াও কাৰো
কথা নুশুনে৷
নিজৰাটো ক্ৰমে তললৈ নামি গৈছে৷ ইয়াত খোজ
কঢ়াটো বৰ কঠিন৷ মাজে মাজে কাঁইটীয়া জোপোহা৷ এজোপা ডাঙৰ গছত হাত দিয়াৰ লগে লগেই
সন্তুৰ হাত ফালি তেজ ওলাবলৈ ধৰিলে৷ গছৰ গাতো কাঁইট৷ তাৰ বেছি ভয় লাগিছে, ক'ৰবাত উজটি খাই পৰি যায় বুলি৷ সি সাগৰৰ
পাৰ গৈ পাবই লাগিব৷
হঠাৎ এটা শব্দত সি উচপ খাই উঠিল৷
শব্দটো ইমানেই বিকট যে গাৰ তেঁজ গোট মাৰি যায়৷ প্ৰথমে ভাব হৈছিল একেলগে দুই-তিনিটা
চৰায়ে কিৰিলীয়াই উঠিছে৷ কিন্তু কি চৰায়ে ইমান বিভৎস সুৰত চিঞৰে? আৰু ইমান জোৰত? শব্দটো এনেকুৱাঃ কিলা কিলা কিলা কিলা
কিলা কিলা৷
সন্তু থমকি ৰৈ গৈছিল৷ অলপ সময় পিছতে
আকৌ একেই ধৰণৰ কিলা কিলা কিলা কিলা শব্দ শুনিবলৈ পোৱা গ'ল তাৰ সোঁফালে৷ আগৰ বাৰ শব্দটো আহিছিল
বাওঁ ফালৰ পৰা৷ এইবাৰ এনেকুৱা লাগিল যেন কেবাজনো মানুহে তাৰ চাৰিওফালে উৰুলি দিছে৷
সন্তুৰ সৰ্ব শৰীৰ কঁপি উঠিল৷
Akou suspence
ReplyDeleteহয়, এতিয়া চাচপেন্সেই চাচপেন্স।
Delete