Wireless Charging- তাঁৰেৰে সংযোগ নকৰাকৈয়ে LED এটা জ্বলাও আহক।

আপোনালোকে নিশ্চয় কেইবছৰ মানৰ পৰা ৱায়াৰলেছ চাৰ্জিঙৰ কথা শুনি আছে৷ য'ত ফোনটোৱে তাঁৰেৰে সংযোগ নকৰাকৈয়ে চাৰ্জ ল'ব পাৰে৷ তাঁৰ নোহোৱাকৈ কেনেকৈ বিদ্যুৎ পৰিবহণ কৰিব পাৰি, আজি আমি সেই বিষয়ে আলোচনা কৰিম৷ কেৱল আলোচনা কৰাই নহয়৷ এটা LED জ্বলাই চাবলৈ চেষ্টা কৰিম৷

ফেৰাডেৰ বিদ্যুৎ চুম্বকীয় আবেশ

যি সকলে ফিজিক্স পঢ়িছিল, তেওঁলোকে নিশ্চয় বিদ্যুৎ চুম্বকীয় আবেশৰ কথা শুনিছে৷ এই বিদ্যুৎ চুম্বকীয় আবেশেই ইয়াৰ মূল ভেটি৷ ১৮২০ চনত হানছ ক্ৰিষ্টিয়ান ওৰেষ্টেদে আবিষ্কাৰ কৰিছিলে যে বিদ্যুৎ প্ৰবাহী তাঁৰ এডালৰ ওচৰে পাজৰে এখন চুম্বকক্ষেত্ৰৰ সৃ্ষ্টি হয়৷ পিছত মাইকেল ফেৰাডেই আবিষ্কাৰ কৰিলে যে যেনেকৈ বিদ্যুতে চুম্বক ক্ষেত্ৰৰ সৃষ্টি কৰিব পাৰে, তেনেকৈ চুম্বকেও বিদ্যুতৰ সৃষ্টি কৰিব পাৰে৷ কুণ্ডলী এটাৰ মাজেৰে চুম্বক এডাল ক্ষীপ্র গতিৰে পাৰ কৰাই নিলে কুণ্ডলীটোত মুহূৰ্তৰ কাৰণে বিদ্যুৎ প্ৰবাহৰ সৃষ্টি হয় বুলি তেওঁ গেলভেন'মিটাৰ এটাৰ সহায়ত প্ৰমাণ কৰি দেখোৱাইছিল৷ চুম্বক ডাল গতি কৰি থকা সময়তহে এই বিদ্যুৎ প্ৰবাহৰ সৃষ্টি হয়৷ ৰখাই দিয়াৰ লগে লগে ই নাইকিয়া হৈ যায়৷ মানে গতিশীল চুম্বক ক্ষেত্ৰ এখনেহে কুণ্ডলী এটাৰ মাজত বিদ্যুৎ প্ৰবাহৰ সৃষ্টি কৰিব পাৰে৷ আৰু এই পৰিঘটনাটোকে বিদ্যুৎ চুম্বকীয় আবেশ (Electromagnetic Induction) বোলা হয়৷

আজিৰ পৰীক্ষাটোৰ কাৰণে আমাক এটা LED, এটা Transistor আৰু অলপ তামৰ তাঁৰৰ প্ৰয়োজন হ'ব৷ মই এটা NPN ট্ৰেনজিষ্টৰ ব্যৱহাৰ কৰিছোঁ৷ এই বস্তু খিনি আপোনালোকে যিকোনো বৈদ্যুতিক মেচিনৰ ভিতৰতে পাব৷ পৰীক্ষাটো ভালদৰে বুজিবলৈ তলৰ ভিডিঅ’টো চাবলৈ অনুৰোধ কৰিলোঁ।

প্ৰথমতে আমি তামৰ তাঁৰ ডালৰে ৩০টা পাকৰ কুণ্ডলী এটা বনাই ল'ব লাগিব৷ আৰু তলৰ ছবি খনত দেখোৱাৰ দৰে কুণ্ডলীটোৰ মুৰত আমি LEDটো গাঁঠি ল'ব লাগিব৷ এই কুণ্ডলীটো আমাৰ ৰিচিভাৰ৷ ইয়াৰ মাজেৰে আমি চুম্বক ক্ষেত্ৰ এখন তীব্ৰ বেগেৰে অগা পিছা কৰি থাকিব পাৰিলে, কুণ্ডলীটোৰ মাজেৰে বিদ্যুৎ প্ৰবাহিত হ'ব আৰু LEDটো জ্বলি উঠিব৷

ৰিচিভাৰ কুণ্ডলী

আমি জানো বিদ্যুৎ প্ৰবাহী তাঁৰৰ ওচৰে পাজৰে এখন চুম্বক ক্ষেত্ৰৰ সৃষ্টি হয়৷ গতিকে আমি আন এটা কুণ্ডলী বনাই তাৰ মাজেৰে বিদ্যুৎ প্ৰবাহিত কৰি দিলে আমি এখন চুম্বক ক্ষেত্ৰ পাম৷ কিন্তু এখন স্থিৰ চুম্বক ক্ষেত্ৰই বিদ্যুতৰ সৃষ্টি কৰিব নোৱাৰে তাৰ বাবে চুম্বক ক্ষেত্ৰখন গতি কৰি থাকিব লাগিব৷ মানে ক্ষেত্ৰৰেখাৰ পৰিবৰ্তন হৈ থাকিব লাগিব৷ যদি আমি দ্বিতীয় কুণ্ডলীটোৰে AC কাৰেণ্ট প্ৰবাহিত কৰো, তেতিয়া AC কাৰেণ্টে যেনেকৈ এবাৰ ইফালে, এবাৰ সিফালে যায়, চুম্বক ক্ষেত্ৰখনৰ ক্ষেত্ৰ ৰেখাবোৰো তেনেকৈ এবাৰ ইফালে, আনবাৰ সিফালে অহা যোৱা কৰি থাকিব৷ কিন্তু আমি যিহেতু DC বেটাৰি ব্যৱহাৰ কৰিম, সেয়ে আন এটা ব্যৱস্থা হাতত ল'ব লাগিব৷ আমি এটা ট্ৰেনজিষ্টৰৰ সহায় ল’ম, যিয়ে কানেক্সনটো অন অফ কৰি থাকিব, ফলত চুম্বকৰ ক্ষেত্ৰ ৰেখা বোৰে তৰংগৰ দৰে গতি কৰিবলৈ আৰম্ভ কৰিব৷

দ্বিতীয়টো কুণ্ডলী

তাৰ বাবে দ্বিতীয়টো কুণ্ডলী বনাওঁতে আমি ১৫নম্বৰ পাকটোত অকণমান তাঁৰ উলিয়াই ৰাখিব লাগিব৷ তাৰ পিছত বাকী ১৫টা পাক মেৰিয়াই আমি ৩০টা পাকৰ কুণ্ডলীটো সম্পূৰ্ণ কৰিব লাগিব৷ ই পোন্ধৰটা পাকৰ দুটা কুণ্ডলীৰ নিচিনা কাম কৰিব। এটা ট্ৰেনজিষ্টৰৰ বেছলৈ যাব। আনটো কালেক্টৰলৈ।

বৰ্তনী

কুণ্ডলীটো সম্পূৰ্ণ হোৱাৰ পিছত আমি ছবিখনত দেখোৱা বৰ্তনীটোৰ দৰে তাঁৰবোৰ সংযোগ কৰিব লাগিব, কুণ্ডলীটোৰ এটা মূৰ ট্ৰেনজিষ্টৰৰ বেছলৈ যাব । ইচ্ছা কৰিলে বেছলৈ যোৱা তাঁৰ ডালত এটা 1 কিলো ওমৰ ৰেজিষ্টৰো সংযোগ কৰিব পাৰিব, ই বেছলৈ যোৱা প্ৰবাহৰ পৰিমাণ কমাই ৰাখিব আৰু ট্ৰেনজিষ্টৰটো গৰম হোৱাৰ পৰা বচাব৷ তাৰপিছত কুণ্ডলীটোৰ আন এটা মুৰ ট্ৰেনজিষ্টৰৰ কালেক্টৰত সংযোগ কৰিব লাগিব৷ আৰু কুণ্ডলীটোৰ মাজৰ ১৫ নম্বৰ পাকত উলিয়াই ৰখা তাঁৰ ডাল বেটাৰিটোৰ প’জিটিভ ফালে সংযোগ কৰিব লাগিব৷ ট্ৰেনজিষ্টৰটোৰ আনটো মূৰ বেটাৰিৰ নিগেটিভলৈ যাব। আপুনি যদি PNP ট্ৰেনজিষ্টৰ ব্যৱহাৰ কৰে বেটাৰিটো ওলোটাই দিলে হ'ল৷ বৰ্তনীটো সম্পূৰ্ণ হোৱাৰ পিছত LEDটো ওচৰলৈ নিলে ই জ্বলি উঠিব৷

এতিয়া আপোনালোকে নিশ্চয় বুজি পালে কেনেদৰে শূন্যৰে বিদ্যুৎ পৰিবহন কৰিব পাৰি৷ আপোনালোকে ঘৰত এই পৰীক্ষাটো কৰি চাব পাৰিব৷ ইয়াৰ পিছৰ আন এটা ভিডিঅ'ত আমি অন্য এটা পদ্ধতিৰে CFL এটা জ্বলাম৷ য'ত ৰিচিভাৰ কুণ্ডলীটোৰো প্ৰয়োজন নহ'ব৷ মাত্ৰ বাল্বটো হাতত লৈ থাকিলে হ'ল৷

আশা কৰো আজিৰ এই পোষ্টটো আপোনালোকে ভালে। আমাৰ আন আন পোষ্ট আৰু ভিডিঅ’ সমূহৰ কাৰণে আমাৰ ইউটিউব চেনেল Me, Myself andRajiv Phukanক চাবস্ক্ৰাইব কৰিবলৈ অনুৰোধ জনালোঁ। ধন্যবাদ।